SMANSAKRA – SMAN 1 Karanganyar ngawontenaken kegiatan FLOOS #4, Senin, 12 Agustus 2024. Kridha menika dipun tindakaken Palang Merah Remaja (PMR) ingkang tembayatan kalihan Pasmagrisaka (Organisasi Pecinta Alam) sarta Organisasi Siswa Intra Sekolah (OSIS). Kepala UDD dr. H. Yaqub Iskandar, MM, mbuka kegiyatan. Ing tanggap wacananipun, dr. Yakub ngalembana greget saha panyengkuyungipun para siswa sarta dwija ing kegiatan donor darah, minangka pambudidaya mbyantu sasami. dr. H. Yaqub Iskandar, MM ugi ngajab, kridha kasebat saged ngemutaken wigatosing kasarasan saha solidaritas sosial.
Kegiatan FLOOS #4 dipunsengkuyung dwija kalihan siswa ingkang umuripun 17 taun langkung, kanthi donor rah. Saderengipun donor rah, sedaya peserta dipun priksa dening tim medis PMI. Kajawi donor darah, kegiyatan menika ugi nggelar cek kesehatan kangge siswa kelas X. Donor darah kasebat minangka wujud perduli sasami. dr. H. Yaqub Iskandar ngandharaken bilih kontribusi donor darah saking SMA Negeri 1 Karanganyar njurung kabetahan rah ing bebrayan.
Kegiatan FLOOS #4 boten namung ngempalaken rah ananging ugi ngemutaken siswa murih langkung nggatosaken kasarasan. Kridha lumampah sae rancag awit panyengkuyungipun sakathahing pehak, kalebet tim medis, dwija, saha panitia.
