SMANSAKRA – Rebo, 07 Agustus 2024, siswa kelas X saha XI SMA Negeri 1 Karanganyar ndherek Nonton Bareng Gerakan Literasi Digital ingkang dipungelar Kementerian Komunikasi dan Informatika tembayatan kalihan Dinas Pendidikan dan Kebudayaan Cabang Dinas Wilayah VI. Kridha menika, dipunsengkuyung sedaya sekolah SMA, SMK sarta SLB ing wewengkon Cabang Dinas Wilayah VI, inggih kabupaten Karanganyar, Sragen, saha Wonogiri, ingkang ngener guru kalihan siswa. Kegiyatan kasebat dipunadani kanthi tema “ Indonesia Melalui Cakap Digital: Penggunaan Internet Positif, Kreatif, dan Aman”.
Kridha dipun gelar lumantar platform zoom meeting ing studio SMA Negeri 1 Karanganyar, kanthi pambiwara Ibu Sunarti, S,Pd saha moderator Ibu Inda Muliana, S,Pd ingkang mujudaken dwija SMA Negeri 1 Karanganyar. Sawetawis, Nonton Bareng ingkang ginelar ing SMA Negeri 1 Karanganyar dipuntindakaken ing sakathahing panggenan. Kelas X ningali Webinar Gerakan Literasi ing Aula SMA Negeri 1 Karanganyar kanthi dipunampingi wali kelas. Wondene kelas XI ndherek Nonton Bareng ing kelasipun piyambak.
Webinar gerakan literasi digital dipunbuka dening Menteri Komunikasi dan Informatika Republik Indonesia, Bapak Budie Arie Setiadi. Kajawi menika wonten ugi nara sumber 3. Para narasumber inggih menika Sigid Susilo, S.E minangka KASI SMA/SMK dan SLB Cabang Dinas Wilayah 6 ingkang ngandharaken babagan Positif, Kreatif, dan Aman di Internet. Lajeng nara sumber Astin Mei Ningsih minangka Koordinator Wilayah Komite Edukasi Mafindo, njlentrehaken babagan Dunia Digital yang Bisa Dimanfaatkan dengan Aman dan Nyaman. Nara sumber pungkasan, Ubaidillah Fatawi, M.Pd ingkang mujudaken Trainer Literasi Digital Siber Kreasi, paring seserepan babagan Etika Digital Agar Lebih Cakap Digital.
Reroncening kegiyatan dipunpungkasi dhiskusi saha kuis interaktif kanthi kanthi hadhiah setunggaling laptop, smartphone 2, sarta saldo dompet digital Rp 1.200.000 kangge tiyang 6 ingkang kasil mangsuli pitakenan. Begjanipun, siswa SMA Negeri 1 Karanganyar, Praja Araya Subiyanto kelas XE1 angsal laptop. Kajawi menika, siswa ing Wonogiri saha Sragen ugi angsal smartphone sarta dompet digital. Hadhiah menika minangka sponsor saking Kementerian Teknologi dan Informatika Republik Indonesia.
